ASA NA ANG MGA KARNERO SA GINOO NIINING PANAHON SA KANGITNGIT: Usa ka hagit

Pagbuto sa balita miaging bisperas sa kalag-kalag mahitungod sa pagpang-raid sa mga opisina sa mga organisasyong milangkob sa koalisyong MAKABAYAN: Bagong Alyansang Makabayan (Bayan), Kilusang Mayo Uno (KMU), Kilusang Magbubukid ng Pilipinas (KMP), Anakpawis, ug Gabriela, ug sa kauban niining National Federation of Sugarcane Workers (NFSW) sa Dakbayan sa Bacolod, milanog sa akong hunahuna ang kabalaka nga ana-a na kita sa ganghaan sa usa ka demokratikong katalagman ug pagpang-ipit sa tawhanong katungod. Kining panghitabo (ang sunod-sunod nga pagpangdakop ug mga kaso sa patay sa mga aktibista, organisador, huwes, artista, ug uban pang lumilihok sa sa masa) gitawag sa kadaghanan sa Facebook isip ang “Gabi ng Lagim”.

Sukad niadtong adlawa hangtod niining pagsulat nako gapadayon ang atake sa wailhing mga elemento (base sa taho sa mainstream media). Luyo niining makapangangha ug makadudang panghitabo, padayon ang aktibidad nga gipasiugdahan sa militar ug kapulisan diha sa pagpangdakop sa mga aktibista ug sa ilang pdayag nga pagpangredtag sa mga personahe ug sa mga lehitimong organisasyong kritikal sa mga kontra-pobre ug kontra-Pilipino nga mga polisiya ug mga lakang niining rehimen ni Rodrigo Duterte.

Pero sa sige nakog basa sa mga update nga gipang-post sa mainstream ug alternative media outfits, journalists, mga aktibista ug mga magsusulat sa sunod-sunod nga pag-target sa rehimen, kalit nga miligis sa akong hunahuna ang mga “relihiyosong” Kristiyano ug ang ilang online nga aktibidad ug pagpadayag sa ilang hunahuna mahitungod niining “crackdown” sa rehimen sa mga aktibista sa Bacolod, ug sa sunod-sunod nga patay sa mga mag-uuma, mga huwes, mga abugado, ubp. Ug sa unsang tanghaga nganong kalit nako sila nadumdoman (nga taod-taod naman nahilom ang hisgotanan sa Anti-Discrimination Bill kun SOGIE diin abtik kaayong mokomentog magpost sa ilang mga hunahunag baroganan mahitungod sa maong lakang nga gatake kuno sa kasagrado sa pamilya ug pag-atake sa gitudlo sa ila sa ilang giilang Ginoo).

Nakahunahuna ko: karong dayag ang pag-atake sa rehimen sa mga ligdong nga mga kritiko niini hilabi na gikan sa organisadong masa, mag-uuma, urban poor, mamumuo, ug mga aktibista sa kinatibuk-an, asa naman ning mga gapadayag sa ilang pagtuo ngadto sa usa ka Ginoo sa Gugma ug Pakig-unong?

Mubong Pagsugid sa Nanghitabo atol sa “Gabi ng Lagim”

31 Oktubre 2019- Dakbayan sa Bacolod

Singkwentay-siyete ka mga aktibista, artista, ug mga unyonista ang gipangdakop sa nagkahiusang operasyon sa kapulisan ug militar pinasubay sa usa ka warrant of arrest tungod kuno sa taho sa mga intellegence sa militar kalabot sa mga “illegal firearms”. Ang maong warrant of arrest gipagawas ni Executive Judge Cecilyn Burgos-Villavert sa Quezon City Regional Trial Court Branch 89. Tuod man gireport sa otoridad sa mga media ang trayntay-dos ka mga armas, tulo ka granada, duha ka grenade launchers, ug sari-saring mga bala.

Naila ang pipila sa mga gidakop silang Anne dela Concepcion, asawa ni Bayan Muna-Negros Secretary General Michael dela Concepcion; Danny Tabura, spokesperson sa KMP; Noli Rosales, spokesperson sa KMU; John Milton Lozande, secretary general sa NFSW ; Proceso Quiatzon, staff member sa Karapatan Negros; ug Romulo Bito-on, coordinator para sa Makabayan Negros. Apil sad sa gipang-aresto mao silang Amaylin Bito-on, Diego Malacad and Roberto Lachica. (“57 activists arrested in Negros”, 2019)

Gidugang sad sa Anakbayan (2019) diha sa ilang Facebook post, sa singkwentay-siyete nga gidakop, trese and menor-de-edad, dose ka batan-on, ug baynte-uno ka trabahante sa Ceres Transport.

1 Nobiyembre 2019- Dakbayan sa Escalante, Negros Occidental ug Masbate

Gi-raid sa mga otoridad ang opisina sa NFSW ug gitamnan og pusil. Gi-aresto ang duha ka lider nga giilang si Imelda Sultan ug Ma.Lindy Perocho. Sa Masbate, pusil-patay si Joan Versaga, miyembro sa Masbate People’s Organization (MAPO) samtang nagsakay og motorsiklo. (“In Less Than A Week”, 2019)

2 Nobiyembre 2019- Dakbayan sa Panabo, Davao del Norte, Masbate, ug Manila

Gitahong nawala si Honey Mae Suazo, kanhing Secretary-General sa Karapatan- Southern Mindanao. Milakaw si Suazo sa ilang panimalay para mobisita sa lubnganan sa iyang pareyente sa Panabo. Kinaulahian siyang nakitang nagsakay og motor.

Laing miyembro sa MAPO sa isla sa Masbate nga giilang si Arnel Ortillano ang gipusil-patay. Si Ortillano usa lamang ka yanong barangay tanod ug habal-habal driver. (“In Less Than A Week”, 2019)

Sa Manila, gidakop si Marvin Returban Primero sa mga sakop sa security sa usa ka mall sa Manila para sa pagpaniktik ni Ramona Dumaguit, spokesperson sa BAYAN Manila human sa iyang pagbisita sa aktibistang manag-asawang si Cora Agovida (Gabriela Metro Manila) ug Michael Tan Bartolome (Kadamay Metro Manila), nga gidakop sa Manila Police District (MPD) Headquarters. Gituohan nga usa ka surviellance agent si Primero. Nakuha sa iya ang usa ka smartphone nga adunay litrato ni Ramona Dumaguit ug usa ka two-way radio. Gidala sa mall security si Primero sa MPD Police Community Precint 5. (“LOOK: BAYAN Manila spokesperson, Ramona Dumaguit”, 2019)

4 Nobiyembre 2019- Dakbayan sa Cabuyao, Laguna

Gitadtad og bala ang kanhing politikanhong piniriso ug organisador sa Makabayan-Southern Tagalog nga si Rey Malaborbor atubangan sa ilang panimalay sa Katapatan Subdivision, Cabuyao City, Laguna . Usa sad siya sa mga organisador sa mga mag-uuma ubos sa hugpong sa Pagkakaisa at Ugnayan ng Magsasaka sa Laguna (PUMALAG). (“In Less Than A Week”, 2019) Daan ng aktibo sa katilingban si Malaborbor. Tungod niini, matod sa Bulatlat (2019), tuig 2010, giakusahan siya sa 1st Infantry Batallion, Philippine Army nga miyembro sa Bagong Hukbong Bayan (BHB) kun New People’s Army (NPA) ug lima katuig siyang napriso uban sa tulo pa ka mga aktibista nga gianggaan kaniadto nga “Lumban 3” bag-o gi-dismissed ang kaso nila kalabot sa “ illegal possession of firearms and explosives”.

5 Nobiyembre 2019- Tondo, Manila, San Fernando La Union ug ang Pagpang-redtag

Gi-raid sa Manila Police District ang opisina sa Bagong Alyansang Makabayan (BAYAN)- Manila. Tulo ka staff niini ang gidakop ug gitamnan og mga pusil ug bala. Kining pag-raid pinasubay sa usa ka search warrant nga gipagawas ni Executive Judge Cecilyn Burgos-Villavert sa Quezon City Regional Trial Court Branch 89, susamang judge nga nagpagawas og search warrant nga mi-raid sa opisina sa BAYAN ug sa mga kaalyadong organisasyon sa Dakbayan sa Bacolod atong ika-31 sa Oktubre 2019.

Sa San Fernando, La Union, gi-ambush sa wailhing mga tawo si Judge Mario Anacleto Banez sa Regional Trial Court (RTC) Branch 25 sa Tagudin, Ilocos Sur. Bag-o ang maong pagpang-ambush sa huwes, gipangkastigo ni General Parlade ang mga huwes nga gapangbasura sa mga kaso kontra sa mga aktibista. Sa kaso ni Judge Banez, iyang gibasura ang gimugna-mugnang kasong murder ug frustrated murder kay Rachel Mariano, usa ka aktibista ug health worker. Ang maong kaso ni Mariano kay gipasaka sa 81st Infantry Batallion. (“In Less Than A Week”, 2019)

Sa susamang adlaw sa usa ka congressional hearing sa Batasang Pambasansa kalabot sa Armed Forces of the Philippines (AFP) Modernization Program usa ka listahan sa mga dise-otso ka mga organisasyon ang gipang-redtag sa AFP ug sa Department of National Defense (DND) sa presentasyon ni Major General Reuben Basiao, AFP Deputy Chief of Staff for Intelligence. Ang mga organisasyon nga gipang-redtag sa militar isip mga “communist fronts” mao ang mga organisasyon nga gatrabaho para sa kalamboan sa mga komunidad nga dili gakahatagan og pagtagad sa mainstream nga panggamhanan. Tulo sa dise-otso ka mga organisasyon nga malisyosong gipang-redtag sa militar mao ang Oxfam, National Council of Churches in the Philippines (NCCP), Farmers Development Centre (Fardec), ug ang Gabriela. (“Redtag Oxfam”, 2019)

Organisasyon sama sa Oxfam nga traynta katuig na nga nakig-partner sa nagkalain-laing Non-Governmental Organzations (NGOs), private sector, government, academe, ug ubang international agencies para makatabang sa pag-alibiyo sa kalisod sa mga lugar sa Pilipinas nga nagkinahanglan og tabang.

Ang Fardec kay usa ka NGO nga gatabang sa mga mag-uuma hilabi na sa Cebu, Bohol, ug Negros Oriental. Sa email nga gipdala ni Patrick Torres sa Rappler (“Redtag Oxfam”, 2019), naapil ang Fardec sa gipang-listahan isip Communist Terrorist Group (CTG) tungod sa kritikal nga baroganan nga gitindogan sa grupo batok sa nagkalain-laing polisiya sa gobyerno kalabot sa rice tarrification law ug sa mga infrastructure project nga gapugos sa mga mag-uuma nga mapapahawa sa yutang ilang gitikad nga gahatag og sakit sa ulo sa mga benepesariyo sa gobyerno nga nagpaluyo niining mga polisiya ug proyekto.

Ang NCCP kay ang kinadak-ang hugpong sa Protestante ug dili-Romano Katolikong denomination sa Pilipinas nga gapangunay sa pagsulong sa values sama sa kahiusahan ug panag-uli, hustisiya ug kalinaw, tawhanong katungod ug integridad sa tawo isip mga binuhat sa Ginoo. Ang ilang adbokasiya pinasubay sa pagtulun-ang gipaambit ni Hesukristo.

Ug ang Gabriela, nga usa sa mga progresibong grupo nga dise-nuybe na nga gaduso ug gaprotekta sa katungod sa kababainhan sa nasod. Gilangkoban kini sa nagkalain-laing organisasyon sa nasod gikan sa kinaubsang bahin sa katilingban. Adbokasiya nila mao ang mga pagmugnag mga programang motubag sa mga isyu kalabot sa tawhanong katungod, kapobrehon, globalisasyon, militarismo, kultura sa rape, panglawas, sex trafficking, censorship ug uban pang isyu nga gakaapekto sa bagang kababainhan sa Pilipinas.

6 Nobiyembre 2019- San Antonio, Milagros, Masbate; Rizal, ug Baguio

Usa ka news alert ang gipagawas sa Defend Bicol Stop The Attacks Network (“NEWS ALERT”, 2019) sa ilang Facebook account nga lima ka mga sibilyan ang gipangpatay sa San Antonio, Milagros, Masbate. Usa sa lima mao ang barangay captain sa San Antonio nga si Arnolfo Dalanon, traynatay-sais anyos. (“Militant agri-groups ask for a stop to attacks”, 2019). Matod sa update sa Defend Bicol Stop The Attacks Network (2019, November 7), alas-siyete sa buntag nga gikuha sa mga personahe sa militar si Dalanon. Alas-dies sa buntag gideklarang patay ang maong barangay captain tungod kuno sa usa ka “encounter”. Ang laing upat ka sibilyan uban sad sa pagkuha pero walay update kalabot kanila niining tungora sa update sa maong grupo. Human nareport ang 57 ka mga aktibista nga gidakop sa Bicol, gibisita kini ni kanhing BAYAN Muna Represenative Neri Colmenares uban sa ubang grupo sa Negros Occidental Provincial Police Office. Sa Facebook update sa mantaalang Visayas Today (“ATM: Former Bayan Muna representative Neri Colmenares…”, 2019), wala kini gitugotan sa kapulisan nga makita ang mga gidakop nga aktibista, sukwahi kini sa katungod nga dapat maangkon ni kinsang madakpan.

7 Nobiyembre 2019

Nabalaka ang mga taga-Ibon Foundation human nakadawat og tawag gikan kay usa ka Col. Joaquin Alba sa National Captial Rregion Police Officer (NCRPO) mahitungod sa “ocular inspection” nga buot nilang ipahigayon sa ilang opisina. Ang Ibon Foundation kay usa ka “independent think tank” nga gapangunayg gawas og mga statistics ug pagpanuki mahitungod sa socio-political nga kahimtang sa Pilipinas. Matod sa Bulatlat, giingon sa mga taga-Ibon Foundation nga giingon sa tawag nga usa ka team sa CIDG ang gapangandam na sa pagpadulong sa ilang opisina kay aduna silay “kuhaon nga tawo” (“Independent think-tank alarmed…”, 2019).

Pipila ra kini sa mga updates ug mga balita nga personal nakong nabasa ug nakuha gikan sa mga gipang-share sa mga kailang nagsunod sa maong isyu sa mga social networking site. Simple lang ang hulagway nga gusto nakong ipakita: adunay sistematikong pag-atake gikan sa rehimen nga gipangulohan ni Rodrigo Duterte batok sa mga kritikong gipang-atake na niya ug mabasa nato sa babaw ug adunayng sistematikong pagpahilom sa mga kritiko sa iyang mga kontra-pobre ug kontra-Pilipinong mga programag mga polisiya.

Kining mga serye sa pag-atake gikondena sa pipila ka mga grupo, institusyon, simbahan, ug organisadong masa tungod dakong supak kini sa kinatibuk-ang demokratikong prinsipyo diha sa pagtugot nga mapadayag sa katawhan ang ilang dili pag-uyon ug pag-supak sa nagkalain-laing mga lakang sa rehimen hilabi na kon gakaligsan niini ang katungod ug ang kaayohan sa mga yanong Pilipino, sa bagang Pilipinhong ginamarhinalisa sa kasamtangang politikanhong sistema.

Wala koy personal nga oposisyon mahitungod sa indibidwal nga desisyon sa mga tawo nga mopilig relihiyon nga kasandigan. Wala koy personal nga oposisyon mahitungod sa nagkalain-laing rason kon nganong ang mayoriya natong mga Pilipino gatuo sa usa ka balaang pwersa nga maoy responsable sa atong existence niining kalibutana. Pero sa akong yanong hunahuna dili nako malikayan nga mangutana: Asa naman kining mga "self-proclaimed" karnero ni Hesukristo nga gakondena sa pag-highlight sa isyu sa discriminasyon sa LGBTQIA+ sector pinaagi sa gi-propose nga pamalaod kalabot sa Anti-Discrimination Bill nga lig-on kanunayon ang ilang mensahe nga dili mahimong adunayng LGBTQIA+ tungod gibawal ni sa Ginoo ug sa ekstensyon niana bawal ang pagkasal sa mga parehong mga gender (bahalag walay labot ang same sex marriage sa Anti-Discrimination Bill).

Wala bay paghisgot sa Bibliya mahitungod sa pagdapig sa mga gipangdaog-daog ug pagsukol sa mga gadaog-daog? Wala bay mga sugilanon mahitungod sa kaagi sa mga featured bida sa Bibliya hilabi na kay Hesukristo diha sa iyang pakigbisog uban sa mga pobre, sa mga gidaog-daog, sa mga gipangsiko sa sistema diha sa kasidsiran sa katilingban? Nakalimot ba ta sa harapan nga paghagit ni Hesukristo sa politikanhong gahom sa Roma pinaagi sa persona ni Pontiyo Pilato?

Kinahanglan guro nato balikan ang mga bersikulo sa Bibilya sama sa Mateo 19:23 " Ug sa iyang mga tinun-an si Jesus miingon, 'Sa pagkatinuod, magaingon ako kaninyo, nga igakalisud unya sa usa ka dato ang pagsulod sa gingharian sa langit'." Sa mga pulong sa Lukas 4:18, "'Ang Espiritu sa Ginoo ania kanako, kay iya man akong gidihugan aron sa pagwali sa maayong balita ngadto sa mga kabus. Gipadala niya ako aron sa pagpahibalo sa kagawasan ngadto sa mga binilanggo ug sa kahiuli sa igtatan-aw ngadto sa mga buta, sa paghatag sa kagawasan ngadto sa mga dinaugdaog'."

Sa sugilanon ni Moses diha sa libro sa Exodus kon giunsa paggiya sa Labawng Makagagahom sa mga Israelita para makalingkawas sa pagka-alipin sa mga taga-Ehipto ug pagkat-on nga mosukol batok sa pangdaog-daog sa mga gamhanan sa Ehipto.

Labaw sa tanan, kinahanglan guro nato madumdoman nga si Hesukristo mismo kay biktima sad sa politikal nga persekusyon sa emperiyo sa Roma. GItawag siya sa isip usa ka instigador sa kagubot sa mga naa sa otoridad tungod sa iyang impluwensya diha sa mga masa. Nahimo siyang sikat sa mga pobre sa nagkalain-laing lugar. Ug ang abilidad ni Hesukristo sa makapatipok ug pagpalihok sa liboan ka mga tawo, gidawat kini sa otoridad ug sa political elite sa Roma isip pamaagi nga malabnot ni Hesukristo ug sa iyang mga disipulo ang political nga gahom pinaagi sa pagdeklara sa kaugalingon isip mensahero sa iyang amahan sa langit ug pag-designate isip anak sa hari sa kahitaas-an. Maong sa way pagduha-duha ug walay pag-agi sa due process diretso nga gibitay si Hesukristo tungod ana nga kahadlok. Tungod lang sa pagwali mahitungod sa iyang pagdapig sa mga pobre ug pagsukol sa mga sistemang gapangdaog-daog.

Kon kaya nato magamit ang mga pulong sa Bibilya sa pagkondena sa mga bayot ug sa kinatikbuk-ang sektor sa LGBTQIA+ ug kon kaya nato ma-weaponize ang mga pulong sa Ginoo sa pagdaog-daog sa mga tawong dili parte sa atong relihiyon, kongregasyon, denominasyon, o kulto, kaya sad guro natong magamit ang mga pagtulun-an sa Bibilya sa pagdepensa sa atong demokratikong katungod nga makapadayag sa atong pagsupak hilabi na sa mga polisiyang gaduot sa mga pobre, programang gapagutom sa atong mga mag-uuma, mga pamalakad nga tatawng paghatag og pabor ngadto sa mga langyawng nasod o korporasyon. Kon kaya nato magamit ang Bibilya para makastoryag dili mao sa mga tawo nga wala nagtuo ug dili mouyon sa atong personal nga bersyon sa pulong sa Ginoo, kaya sad guro nato magamit ang mga pulong sa Bibliya para manawagan og kabag-ohan niining atong nasod hilabi na pag-abot sa hisgotanan sa tawhanong katungod (daghang estatistika ug pagtulun-an ang nanggawas diri sa Pilipinas o gawas sa nasod ang usa ang Pilipinas sa nag-unang mga nasod nga adunay dakong problema sa tawhanong katungod ug sa mga nasod nga dili maayo ang kahimtang sa mga mamumuo niini).

Karon nga naa natas panahon diin ginapahilom ang mga grupong ang katuyoan lamang mao ang pagtabang sa mga pobre. Lehitimo ang mga pagsupak ug pagsukol nga gipadayag sa katawhan gikan sa nagkalain-laing sektor tungod sa wala-tuong mga dokumentaryong mga ebidensya ug dili lang pagpamatakag paturatoyng pag-engineer og kagubot for the sake sa kagubot. Lehitimo ang yangongo sa kabalaka sa mga mag-uuma sa pagsagyad sa presyo sa humay tungod sa Rice Tarrification Law. Lehitimo ang yangongo sa mga urban poor sa ilang giyangongong pabalay ug ang pagpadali sa proseso para sa nasodnong programang magpabalay sa mga wala pay balay hilabi na para sa mga pamilyang naa ubos sa poverty level hilabi na nga nakita nila nga ubay-ubay sad ang mga programang pabalay sa nasod nga wala gipanggamit ug nagtingkagol lang, hinay-hinayng gikaon sa anay. Lehitimo ang yangongo sa mga nagkalain-laing lumadnong katilingban sa nasod diha sa ilang reklamo sa wala-tuong pagpalayas kanila sa ilang yutang kabilin para daw sa ngalan sa “kalamboan”, sama sa nahitabo sa komunidad sa mga Aeta sa Clark sama puhon sa mahitabo sa lumadnong komunidad nga ipalubog Kaliwa Dam Project. Kon dili na tubagon sa gobyerno, kon dili dunggon sa gobyerno ang yangongo sa mga tawong daw ilang gisumpaang protektahan para pagserbisyo sa interes sa interes sa pipila nga mas bug-at para nila. Lehitimo kining tanang mga yangongo nga girepresentahan sa mga grupong ginatarget sa estado tungod naay gipanggutom. Dili lang kini sila mga numero sa estatistika pero buhi kini sila nga mga tawong adunay pangalan, adunay ambisyon, adunay pamilya nga gamahal kanila. Naay mga kinabuhing nakalas tungod sa mga kontra-Pilipino ug kontra-pobre nga mga programa.

Naa guroy mga panahon nga dihang nagbasa-basa ta  sa mga sugilanon ni Heuskristo sa Bibilya, nakaingon na guro ka "Sos kon naa pa lang ko sa panahon ni Moses o ni Hesukristo, maningkamot gyod ko nga makatabang uban kanila diha sa paghatag og serbisyo sa mga pobre. Usa na guro ko sa makigbisog kontra ni Pontiyo Pilato diha sa iyang pagdakop ni Hesukristo ug sa pagpalansang kaniya sa cross". Mao na ni ang panahon. Mao na ni ang panahon nga mapakita ug mabutang sa praktika ang mga maayong pagtulun-ang gipaambit ni Hesukristo hilabi na sa mga hisgotanan kon unsaon pagbarog sa imong katungod ug sa pag-dapig sa mga gipangdaog-daog.

         Ang pagsuporta sa kausa sa pagprotekta sa demokrasiya ug sa pagpalig-on sa integridad sa demokratikong prinsipyo nga gituohan natong gibutang sa pundasyon niining atong yanong nasod. Dili krimen ang aktibismo. Dili terorismo ang pagdapig sa mga pobre sa kaitlingban ug sa mga gidaog-daog. Lehitimo ang pagsukol kon ang rason sa atong pagkontra mao ang mga polisiyag programang gabutang sa kinabuhi natong mga Pilipino sa kaalaot.

Ang pakigbisog alang sa kaayohan sa kadaghanan ug dili lang sa mga pipilang adunahan dili kagubot ang katuyoan kondili nagpakita lang kini sa atong pagmahal sa atong inahang nasod aron naay maabtang maayong kaugmaon ang atong mga anak sa umaabot.

 

Image 1 Gikan sa Facebook Post sa

The Kill List Chronicles, November 5, 2019

PARA SA DUGANG KASAYORAN

Anak Bayan. (2019, November 6). In Less Than A Week. https://www.facebook.com/anakbayanphils [Facebook Photo post] Retrieved from http://tiny.cc/AnakBayan2019

Cepeda, M. (2019, November 5). Red-tagged Oxfam, NCCP slam military for 'malicious, careless' attack. Rappler. Retrieved from https://www.rappler.com/nation/244252-red-tagged-oxfam-nccp-slam-mil itary

Chavez, C. (2019, November 11). Militant agri- groups ask for a stop to attacks on farmers, barangay officials. Manila Bulletin. Retrieved from https://news.mb.com.ph/2019/11/11/militant-agri-groups-ask-for-a-stop-to -attacks-on-farmers-barangay-officials/

Defend Jobs Philippines. (2019, November 2) LOOK: BAYAN Manila spokesperson, Ramona Dumaguit. https://www.fb.com/defendjobPH/  [Facebook Post] Retrieved from http://tiny.cc/bayansurveillance

Defend Bicol Stop The Attacks Network. (2019, November 6) NEWS ALERT. https://www.fb.com/defendbicol.stoptheattacks/ [Facebook Post] Retrived from http://tiny.cc/5civilianskilled Update (2019, November 7) http://tiny.cc/5civiliansupdate

Gomez, C. P. (2019, November 2). 57 activists arrested in Negros. Philippine Daily Inquirer. Retrieved from https://newsinfo.inquirer.net/1184834/57-activists-arrested-in-negros

Macaraeg, J.A (2019, November 7). Independent think-tank alarmed over ‘notice of police inspection’. Bulatlat. Retrieved from https://www.bulatlat.com/2019/11/07/independent-think-tank-alarmed-ov er-notice-of-police-inspection/

The Kill List Chronicles. (2019, November 5) From writer Nash Tysmans... https://www.facebook.com/kill.list.chronicles/ [Facebook Photo post]   Retrieved from https://www.fb.com/kill.list.chronicles/photos/a.656619184500590/1743002962528868/

Umali, J. (2019, November 5). Peasant activist shot dead in front of house. Bulatlat. Retrieved from https://www.bulatlat.com/2019/11/05/peasant-activist-shot-dead-in-front- of-house/

Visayas Today. (2019, November 6) ATM: Former Bayan Muna representative Neri Colmenares… https://www.fb.com/VisayasToday/ [Facebook Photo post] http://tiny.cc/Colmeresbarred