Pagpamalandong sa Anak sa iyang Amahang Magtutudlo: Usa ka Pamulong
Kini usa ka retirement speech nga gi-deliver sa magsusulat atol sa retirement party sa iyang amahan miaging ika-3 sa Hulyo, 2019 sa Function Hall, Go Hotels-Robinsons Place, Iligan City ug gitambongan sa pipila ka mga magtutudlo ug mga school administrators sa Department of Education- Division of Iligan City.
Maayong adlaw sa tanan. Ako si Gil Nambatac, ang kinamagulangang anak ni Angelito Nambatac, Sr nga karon naa sa atong atubangan uban sa upat niyang mga kauban nga magsaulog sa kataposan nilang adlaw isip mga magtutudlo. Ug karong hapona natunga sa duha ka bahin kining akong mubong speech para niining importanteng takna sa iyang kinabuhi: una, mao ang akong personal nga account ug mga testimonya mahitungod sa akong amahan isip magtutudlo; ug ang ikaduha mao ang mubong pagpamalandong kon para asa gyod ning pagsaulog sa retirement party.
Gamay ra siguro ang nasayod sa dagan sa kinabuhi sa akong amahan ug mas mahinungdanon kining akong speech ug mahinungdanon kining pagsaulog sa iyang retirement kon subayon nato sa makadali ang iyang kinabuhi ug magpasalamat sa tawong nahatag sa atong tanan sa usa ka Lito Nambatac nga atong nailhan karon:
Ang tibuok kinabuhi sa akong amahan nagtuyok lang diha sa pagpakabuhi sa lisod nilang kahimtang sa Badjiang, Bohol uban sa iyang madasigon, kugihan, ug madiskarteng inahan nga milangyaw sa Mindanao aron manarbaho isip katabang para masustentohan lang ang iyang nag-inusarang anak sa Bohol nga sa sayong pangedaron nagsagubang na sa iyang kaugalingong mga problema ug naningkamot nga mabuhi bahalag layo kay siya sa iyang inahan.
Sama sa gisugyot sa panultihon “Like Father, like Son” nahimo na sad nga amahan kaniya ang iyang inahan. Ang tanang kadasig, kakugi, ug madiskarte nakuha sad sa iyang nag-inusarang unico iho. Bisag nagdako siya nga way “father figure” nga ginahangad ug ginahandom-handom, wala nasipyat ang iyang inahan sa pagpuno sa sapatos sa usa ka amahan. Kadaghanan sa ato karon nagatuo nga usa ka kawad-on sa usa ka pamilya hilabi na sa atong mga anak nga way mamathang amahan. Pero ang tinuod ana, usa kana ka dakong oportunidad ug hagit kanato nga magtubo nga maayo ug mapuslanong tawo sa atong pamilya ug sa katilingban. Kon naa man tay labing pasalamatan karong higayona, tugoti ko sa paghatag niini ngadto sa akong Lola nga si Benita Nambatac nga tu-a na karon nagpahuway uban sa iyang Mambubuhat. Atong ihalad ang usa ka masipang pakpak sa maayong pagmatuto ug pagpadako niya sa akong amahan. Kon unsa man gani siya karon, kana tungod sa akong Lola. Daghang Salamat, La.
Walay laing pulong ang puyde nakong mahubit sa akong amahan kundili ang duha ka pulong nga “MODEL TEACHER”. Sama natong tanan, hilabi na sa inyo nga naa karon, walay perpektong tawo ni perpektong magtutudlo. Ug usa ang akong amahan sa daghan ug pipila ka mga magtutudlo nga matawag natong “MODEL”. Pero unsa diay ang mga kinaiya, nga mao say naangkon sa akong amahan, para makonsidera nato ang usa ka magtutudlo nga “MODEL TEACHER”?
Una, ang iyang dedikasyon sa trabaho. Sukad sa among pagkabata ug hangtod karon, makita namo ang dedikasyon sa akong amahan sa iyang trabaho. Para sa ako morag dili na ni niya trabaho kundili usa na ka passion: diin ang monetary reward, pinaagi sa iyang madawatan nga binulang sweldo, sa iyang pagtrabaho nabutang na lang sa sekondarya sa iyang concerns. Ang labing una niini mao ang iyang pagbati kon sa unsang pamaagi siya makatabang sa mga estudyanteng moagi sa iyang classroom o unsang lakang ang puyde niyang mabuhat para makatabang sa bisan kinsang tawo nga nagkinahanglan sa iyang tabang. Dedicated siya sa iyang pagka-teacher kay ang iyang intelektwal ug moral nga responsibilidad sa iyang mga bata mo-extend pa gawas sa upat ka dingding sa klasroom. Gikan sa mga estudyanteng way pamahaw nga mosulod sa klase, mga estudyanteng kulang ang mga gamit sa eskuylahan, mga estudyanteng kulang ang pagsuporta sa ilang ginikanan, kana tanan iyang ginasigurado ug iyang ginapaningkamotan nga makahatag siyag bisag gamayng pag-abag sa kabug-at sa problema nga gibitbit sa iyang mga estudyante.
Ang kasinatian sa akong amahan isip magtutudlo ang tataw nga testamento sa esensya sa pagtabang: nga bisag ikaw pa ang kinapobrehan sa tanang pobre pero aduna kay kasingkasing ug hunahuna nga motabang sa ubang nagkinahanglan, ang higayon na mismo ang mangitag pamaagi para ikaw mahimong instrumento sa kasolbaran sa problema sa laing tawo. Bisan man dili ingon ana ka dako ang ginadawat sa usa ka magtutudlo, aduna pay mga panginahanglanon sa iyang pamilya nga angay hunahunapn pero way sipyat ang akong amahan nga motabang sa nagkinahanglan. Kabalo ang pipila nato diri nga kini usa lamang sa ginatawag natong “tip of the iceberg” sa iyang mga pagtabang nga nahimo sukad nanumpa siya sa iyang propesyon.
Ikaduha, ang iyang pagka maabi-abihon sa mga tawo sa bisan unsang background o ang-ang sa katilingban. Naka-handle akong papa ug class advisory pero mas napakita niya ang iyang full potential dihang gibutang siya sa Non-Formal Education (NFE) kaniadto, nga Alternative Learnign System (ALS) na karon. Sa nature sa maong assignment, kanunay ang iyang pag-immerse ug pakiglambigit sa mga tawo sa komunidad. Nakaserbisyo siya sa gitawag natong mga “poorest of the poor” ug nadasig na niya ang pipila ka mga tawong gikan niining maong ang-ang sa katilingban para mobalik sa pag-eskuyla ug mahatagag tsansa nga makatagamtam og bisan gamay nga kaharuray sa kinabuhi. Nasayod tang tanan nga bisan sauna man o karon, gamay ra gihapon ang budget nga ginahatag sa maong programa sa edukasyon sa gobyerno pinaagi sa DepEd. Maong kinahanglan sad ang tabang sa ubang pribadong mga indibidwal o kompanya nga asensado para mabuhat sa akong amahan ang iyang mandato luyo sa kakulangon sa resources sa DepEd. Niining duha ka kalibotan sa mga adunahan ug sa mga naa sa kakulangon maoy ginatabok-tabok lang sa akong amahan ug nahimo siyang tulay aron makatabang ngadto sa mga mas gakinahanglan.
Layo ug sukwahi kini sa pipila ka mga magtutudlo, mga kaubanan sa akong amahan, nga human mataoran lang og dungag nga ekstensyon sa pangalan, mapa-MA man o PhD, nakabati na silag kaanyag, daw ang gitaod sa ilaha kay mga pako ug dili na kabalo motugpa. Nakalimot sila sa esensya sa pagtudlo isip usa ka noble profession: ang magpabiling mapahiubsanon ug magdalag inclusive nga kinaiya, nga bisan unsa pa na ang background o kahimtang sa kinabuhi sa imong gikaatubang, aduna silay ilang kaugalinong lugar sa imong kasingkasing.
Ikatulo, pagka-makontento sa mga butang nga naangkon ug oportunidad nga moabot sa kinabuhi. Way daghang arte ang akong amahan. Kon unsay naa, iya kanang pangitaan og pamaagi nga magamit ni niya para mapalambo ang iyang kaugalingon. Ug sa ako isip anak nga nagtan-aw sa akong amahan, ing-ani sad ang iyang attitude sa iyang propesyon.
Dili kaayo ko makadungog niya nga nga nangambisyon mahimong prinsipal o diba kaha superintendent. Sa lain nga bahin, kami pa, iyang mga anak, ang gadasig kanila (apil na sa akong inahan nga usa sad ka magtutudlo) nga molayat gawas sa ilang kasamtangang lebel sa pagkamagtutudlo. Kabalo kong kaya na nila ug kabalo kong mas maayo pa silang mga school administrator kaysa sa mga school administrator nga naa nato karon diri sa Division sa Iligan. Dili sila korap. Dili kabalo manglimbong sa ilang isig ka maestra. Dili kabalo mobalibad sa hangyo sa estudyante o kauban sa trabaho nga nangayo og butang para sa kaayohan sa tanan. Dili sila pareha sa pipila ka mga prinsipal nga atong nadungan sa karon ug sa mga milabayng katuigan nga gipangkihaan ug gipang-file-an ug kasong administratibo o kriminal tungod sa korapsyon o harassment. O dili ba kaha mga magtutudlo o school admin nga wala pa nadiskobrehan ang ilang ngil-ad nga baho. Kontento kaayo sila, hilabi na akong amahan, sa kon asa siya karon sa halapad nga kalibotan sa DepEd. Matod pa niya, wala na siya nangambisyon sa mga dagkong mga puwesto. Bisag unsaon pagbali-bali, magtutudlo ra gihapon na sila, magtutudlo ra gihapon tang tanan. Labaw pa ana, wala sa de aircon nga opisina makita ang iyang kasingkasing pero naa sa gawas, sa init ug abogon nga reyalidad sa sabakan sa masa nga nagkinahanglan sa iyang serbisyo.
Daghan pa tang puydeng maingon niya. Pero mahurot gyod ang atong limitadong oras kon himay-himayon nato ning tanan. Kon kamo adunay mga gikabiliban ug gika-admire sa akong amahan isip magtutudlo, ihunghong na lang na sa inyong kasingkasing ug pamalandongi nga sa kon unsang pamaagi kaha na ninyo maangkon kana nga maayong kinaiya.
Dakong tabang ang atong mga pasidungog ug uban pang mga maayong pulong kaniya ug sa ubang kauban ni-a sa atubangan karon nga nag-selebrar sa pagtapos sa ilang serbisyo. Pero mas dakog impact kon ang mga maayong kinaiya nila atong mahangop ug mapangitaag pamaagi nga ang ilang binuhatan mahimo sad natong atong legasiya nga mabilin sa komunidad kon atong turno na sad nga moselebrar sa atong retirement.
Which will lead me sa kataposang parte sa akong speech karong hapona, kalabot sa esensya sa retirement. Sa ato nga naa karon nga naglingkod ug aktibo pa sa serbisyo, nga naa pay hunahunaong tsikonong papel pag-uli o gahunahuna sa ubang mga papeles nga kinahanglan I-submit sa ilang mga prinsipal o head teacher, gusto nako ni gamiton nga oportunidad sa pagpadumdom kon nganong naa ta karon sa retirement party ning atong mga kauban.
Gusto nako inyong ning ipangutana sa inyong kaugalingon: kon ako kaha ang mo-retire unsa kaha ang gusto nakong ibilin sa komunidad diin gatudlo ko karon? Unsang pagtulun-an ug values ang gusto nako ibilin sa tanang estuydante nga moagi ug mogawas sa akong classroom? Sukad sa akong pagsulod sa maong propesuon, naa bay nahimong kalamboan sulod sa DepEd nga akong maappreciate kon ako nasad ang moretire? Unsa kaha akong matabang aron maabot sa DepEd ang kalamboan nga gipangandoy niya sa umaabot? Unsa kaha akong personal nga damgo para sa akong eskuylahan? Milambo ba ang among working environment? Milambo ba “way of living” namong mga magtutudlo? Milambo ba ang among sweldo bahalag mas ginapaboran ang mga sundalo ug gikalimtan na ang mga magtutudlo nga primerang nagtan-aw ug nagmatuto sa “future of the motherland”? Milambo ba ang kinabuhi namong mga magtutudlo o sa nagkadugay nagkadaghan na sad ang mga papel-papel nga ginarequire sa amo, sa kadaghan nakalimtan na namo among responsibilidad sa classroom?
Usa lang akong maingon para natong tanan: dili ta magpaabot kon unsay ihatag sa ato. Suportahan nato ng mga lakang sa pipila ka mga grupo sa mga magtutudlo nga sa kasamtangan gapangayog kalamboan para natong tanan ug i-pressure nato atong mga school administrator nga mo-pressure sad sa ilang mga superior nga ihatag kon unsay angay ihatag sa inyo. Dili lalim ang pagkamagtutudlo. Mosugot lang ba kita nga kon unsa ta pagsulod mao ra sad atong kinabuhi nga atong maabtan kon kita na sad ang mosaulog sa atong retirement. Dili unta “Hay! Salamat! Retired na gyod ko” ang atong maingon kundili “Hay! Salama! Nahimong mapuslanon ang akong kinabuhi tungod ako usa ka magtutudlo.
Daghang Salamat sa tanan.
Napatik na kining maong gumalaysay sa Bisaya Magasin.
Maayong adlaw sa tanan. Ako si Gil Nambatac, ang kinamagulangang anak ni Angelito Nambatac, Sr nga karon naa sa atong atubangan uban sa upat niyang mga kauban nga magsaulog sa kataposan nilang adlaw isip mga magtutudlo. Ug karong hapona natunga sa duha ka bahin kining akong mubong speech para niining importanteng takna sa iyang kinabuhi: una, mao ang akong personal nga account ug mga testimonya mahitungod sa akong amahan isip magtutudlo; ug ang ikaduha mao ang mubong pagpamalandong kon para asa gyod ning pagsaulog sa retirement party.
Gamay ra siguro ang nasayod sa dagan sa kinabuhi sa akong amahan ug mas mahinungdanon kining akong speech ug mahinungdanon kining pagsaulog sa iyang retirement kon subayon nato sa makadali ang iyang kinabuhi ug magpasalamat sa tawong nahatag sa atong tanan sa usa ka Lito Nambatac nga atong nailhan karon:
Ang tibuok kinabuhi sa akong amahan nagtuyok lang diha sa pagpakabuhi sa lisod nilang kahimtang sa Badjiang, Bohol uban sa iyang madasigon, kugihan, ug madiskarteng inahan nga milangyaw sa Mindanao aron manarbaho isip katabang para masustentohan lang ang iyang nag-inusarang anak sa Bohol nga sa sayong pangedaron nagsagubang na sa iyang kaugalingong mga problema ug naningkamot nga mabuhi bahalag layo kay siya sa iyang inahan.
Sama sa gisugyot sa panultihon “Like Father, like Son” nahimo na sad nga amahan kaniya ang iyang inahan. Ang tanang kadasig, kakugi, ug madiskarte nakuha sad sa iyang nag-inusarang unico iho. Bisag nagdako siya nga way “father figure” nga ginahangad ug ginahandom-handom, wala nasipyat ang iyang inahan sa pagpuno sa sapatos sa usa ka amahan. Kadaghanan sa ato karon nagatuo nga usa ka kawad-on sa usa ka pamilya hilabi na sa atong mga anak nga way mamathang amahan. Pero ang tinuod ana, usa kana ka dakong oportunidad ug hagit kanato nga magtubo nga maayo ug mapuslanong tawo sa atong pamilya ug sa katilingban. Kon naa man tay labing pasalamatan karong higayona, tugoti ko sa paghatag niini ngadto sa akong Lola nga si Benita Nambatac nga tu-a na karon nagpahuway uban sa iyang Mambubuhat. Atong ihalad ang usa ka masipang pakpak sa maayong pagmatuto ug pagpadako niya sa akong amahan. Kon unsa man gani siya karon, kana tungod sa akong Lola. Daghang Salamat, La.
Walay laing pulong ang puyde nakong mahubit sa akong amahan kundili ang duha ka pulong nga “MODEL TEACHER”. Sama natong tanan, hilabi na sa inyo nga naa karon, walay perpektong tawo ni perpektong magtutudlo. Ug usa ang akong amahan sa daghan ug pipila ka mga magtutudlo nga matawag natong “MODEL”. Pero unsa diay ang mga kinaiya, nga mao say naangkon sa akong amahan, para makonsidera nato ang usa ka magtutudlo nga “MODEL TEACHER”?
Una, ang iyang dedikasyon sa trabaho. Sukad sa among pagkabata ug hangtod karon, makita namo ang dedikasyon sa akong amahan sa iyang trabaho. Para sa ako morag dili na ni niya trabaho kundili usa na ka passion: diin ang monetary reward, pinaagi sa iyang madawatan nga binulang sweldo, sa iyang pagtrabaho nabutang na lang sa sekondarya sa iyang concerns. Ang labing una niini mao ang iyang pagbati kon sa unsang pamaagi siya makatabang sa mga estudyanteng moagi sa iyang classroom o unsang lakang ang puyde niyang mabuhat para makatabang sa bisan kinsang tawo nga nagkinahanglan sa iyang tabang. Dedicated siya sa iyang pagka-teacher kay ang iyang intelektwal ug moral nga responsibilidad sa iyang mga bata mo-extend pa gawas sa upat ka dingding sa klasroom. Gikan sa mga estudyanteng way pamahaw nga mosulod sa klase, mga estudyanteng kulang ang mga gamit sa eskuylahan, mga estudyanteng kulang ang pagsuporta sa ilang ginikanan, kana tanan iyang ginasigurado ug iyang ginapaningkamotan nga makahatag siyag bisag gamayng pag-abag sa kabug-at sa problema nga gibitbit sa iyang mga estudyante.
Ang kasinatian sa akong amahan isip magtutudlo ang tataw nga testamento sa esensya sa pagtabang: nga bisag ikaw pa ang kinapobrehan sa tanang pobre pero aduna kay kasingkasing ug hunahuna nga motabang sa ubang nagkinahanglan, ang higayon na mismo ang mangitag pamaagi para ikaw mahimong instrumento sa kasolbaran sa problema sa laing tawo. Bisan man dili ingon ana ka dako ang ginadawat sa usa ka magtutudlo, aduna pay mga panginahanglanon sa iyang pamilya nga angay hunahunapn pero way sipyat ang akong amahan nga motabang sa nagkinahanglan. Kabalo ang pipila nato diri nga kini usa lamang sa ginatawag natong “tip of the iceberg” sa iyang mga pagtabang nga nahimo sukad nanumpa siya sa iyang propesyon.
Ikaduha, ang iyang pagka maabi-abihon sa mga tawo sa bisan unsang background o ang-ang sa katilingban. Naka-handle akong papa ug class advisory pero mas napakita niya ang iyang full potential dihang gibutang siya sa Non-Formal Education (NFE) kaniadto, nga Alternative Learnign System (ALS) na karon. Sa nature sa maong assignment, kanunay ang iyang pag-immerse ug pakiglambigit sa mga tawo sa komunidad. Nakaserbisyo siya sa gitawag natong mga “poorest of the poor” ug nadasig na niya ang pipila ka mga tawong gikan niining maong ang-ang sa katilingban para mobalik sa pag-eskuyla ug mahatagag tsansa nga makatagamtam og bisan gamay nga kaharuray sa kinabuhi. Nasayod tang tanan nga bisan sauna man o karon, gamay ra gihapon ang budget nga ginahatag sa maong programa sa edukasyon sa gobyerno pinaagi sa DepEd. Maong kinahanglan sad ang tabang sa ubang pribadong mga indibidwal o kompanya nga asensado para mabuhat sa akong amahan ang iyang mandato luyo sa kakulangon sa resources sa DepEd. Niining duha ka kalibotan sa mga adunahan ug sa mga naa sa kakulangon maoy ginatabok-tabok lang sa akong amahan ug nahimo siyang tulay aron makatabang ngadto sa mga mas gakinahanglan.
Layo ug sukwahi kini sa pipila ka mga magtutudlo, mga kaubanan sa akong amahan, nga human mataoran lang og dungag nga ekstensyon sa pangalan, mapa-MA man o PhD, nakabati na silag kaanyag, daw ang gitaod sa ilaha kay mga pako ug dili na kabalo motugpa. Nakalimot sila sa esensya sa pagtudlo isip usa ka noble profession: ang magpabiling mapahiubsanon ug magdalag inclusive nga kinaiya, nga bisan unsa pa na ang background o kahimtang sa kinabuhi sa imong gikaatubang, aduna silay ilang kaugalinong lugar sa imong kasingkasing.
Ikatulo, pagka-makontento sa mga butang nga naangkon ug oportunidad nga moabot sa kinabuhi. Way daghang arte ang akong amahan. Kon unsay naa, iya kanang pangitaan og pamaagi nga magamit ni niya para mapalambo ang iyang kaugalingon. Ug sa ako isip anak nga nagtan-aw sa akong amahan, ing-ani sad ang iyang attitude sa iyang propesyon.
Dili kaayo ko makadungog niya nga nga nangambisyon mahimong prinsipal o diba kaha superintendent. Sa lain nga bahin, kami pa, iyang mga anak, ang gadasig kanila (apil na sa akong inahan nga usa sad ka magtutudlo) nga molayat gawas sa ilang kasamtangang lebel sa pagkamagtutudlo. Kabalo kong kaya na nila ug kabalo kong mas maayo pa silang mga school administrator kaysa sa mga school administrator nga naa nato karon diri sa Division sa Iligan. Dili sila korap. Dili kabalo manglimbong sa ilang isig ka maestra. Dili kabalo mobalibad sa hangyo sa estudyante o kauban sa trabaho nga nangayo og butang para sa kaayohan sa tanan. Dili sila pareha sa pipila ka mga prinsipal nga atong nadungan sa karon ug sa mga milabayng katuigan nga gipangkihaan ug gipang-file-an ug kasong administratibo o kriminal tungod sa korapsyon o harassment. O dili ba kaha mga magtutudlo o school admin nga wala pa nadiskobrehan ang ilang ngil-ad nga baho. Kontento kaayo sila, hilabi na akong amahan, sa kon asa siya karon sa halapad nga kalibotan sa DepEd. Matod pa niya, wala na siya nangambisyon sa mga dagkong mga puwesto. Bisag unsaon pagbali-bali, magtutudlo ra gihapon na sila, magtutudlo ra gihapon tang tanan. Labaw pa ana, wala sa de aircon nga opisina makita ang iyang kasingkasing pero naa sa gawas, sa init ug abogon nga reyalidad sa sabakan sa masa nga nagkinahanglan sa iyang serbisyo.
Daghan pa tang puydeng maingon niya. Pero mahurot gyod ang atong limitadong oras kon himay-himayon nato ning tanan. Kon kamo adunay mga gikabiliban ug gika-admire sa akong amahan isip magtutudlo, ihunghong na lang na sa inyong kasingkasing ug pamalandongi nga sa kon unsang pamaagi kaha na ninyo maangkon kana nga maayong kinaiya.
Dakong tabang ang atong mga pasidungog ug uban pang mga maayong pulong kaniya ug sa ubang kauban ni-a sa atubangan karon nga nag-selebrar sa pagtapos sa ilang serbisyo. Pero mas dakog impact kon ang mga maayong kinaiya nila atong mahangop ug mapangitaag pamaagi nga ang ilang binuhatan mahimo sad natong atong legasiya nga mabilin sa komunidad kon atong turno na sad nga moselebrar sa atong retirement.
Which will lead me sa kataposang parte sa akong speech karong hapona, kalabot sa esensya sa retirement. Sa ato nga naa karon nga naglingkod ug aktibo pa sa serbisyo, nga naa pay hunahunaong tsikonong papel pag-uli o gahunahuna sa ubang mga papeles nga kinahanglan I-submit sa ilang mga prinsipal o head teacher, gusto nako ni gamiton nga oportunidad sa pagpadumdom kon nganong naa ta karon sa retirement party ning atong mga kauban.
Gusto nako inyong ning ipangutana sa inyong kaugalingon: kon ako kaha ang mo-retire unsa kaha ang gusto nakong ibilin sa komunidad diin gatudlo ko karon? Unsang pagtulun-an ug values ang gusto nako ibilin sa tanang estuydante nga moagi ug mogawas sa akong classroom? Sukad sa akong pagsulod sa maong propesuon, naa bay nahimong kalamboan sulod sa DepEd nga akong maappreciate kon ako nasad ang moretire? Unsa kaha akong matabang aron maabot sa DepEd ang kalamboan nga gipangandoy niya sa umaabot? Unsa kaha akong personal nga damgo para sa akong eskuylahan? Milambo ba ang among working environment? Milambo ba “way of living” namong mga magtutudlo? Milambo ba ang among sweldo bahalag mas ginapaboran ang mga sundalo ug gikalimtan na ang mga magtutudlo nga primerang nagtan-aw ug nagmatuto sa “future of the motherland”? Milambo ba ang kinabuhi namong mga magtutudlo o sa nagkadugay nagkadaghan na sad ang mga papel-papel nga ginarequire sa amo, sa kadaghan nakalimtan na namo among responsibilidad sa classroom?
Usa lang akong maingon para natong tanan: dili ta magpaabot kon unsay ihatag sa ato. Suportahan nato ng mga lakang sa pipila ka mga grupo sa mga magtutudlo nga sa kasamtangan gapangayog kalamboan para natong tanan ug i-pressure nato atong mga school administrator nga mo-pressure sad sa ilang mga superior nga ihatag kon unsay angay ihatag sa inyo. Dili lalim ang pagkamagtutudlo. Mosugot lang ba kita nga kon unsa ta pagsulod mao ra sad atong kinabuhi nga atong maabtan kon kita na sad ang mosaulog sa atong retirement. Dili unta “Hay! Salamat! Retired na gyod ko” ang atong maingon kundili “Hay! Salama! Nahimong mapuslanon ang akong kinabuhi tungod ako usa ka magtutudlo.
Daghang Salamat sa tanan.
Napatik na kining maong gumalaysay sa Bisaya Magasin.
Comments
Post a Comment